ਆਈਪੀਐਲ ਧਮਾਕਾ: ਏਕਾਨਾ ਸਟੇਡੀਅਮ ’ਚ ਅੱਜ ਲਖਨਊ ਅਤੇ ਕੋਲਕਾਤਾ ਦੀ ਟੱਕਰ; ਅੰਕ ਸੂਚੀ ’ਚ ਸੁਧਾਰ ਲਈ ਦੋਵੇਂ ਟੀਮਾਂ ਲਗਾਉਣਗੀਆਂ ਜ਼ੋਰ

ਇੰਡੀਅਨ ਪ੍ਰੀਮੀਅਰ ਲੀਗ (IPL) ਦੇ ਮੌਜੂਦਾ ਸੀਜ਼ਨ ਵਿੱਚ ਅੱਜ ਸੁਪਰ ਸੰਡੇ ਦੇ ਦੂਜੇ ਮੁਕਾਬਲੇ ਵਿੱਚ ਲਖਨਊ ਸੁਪਰ ਜਾਇੰਟਸ (LSG) ਆਪਣੇ ਘਰੇਲੂ ਮੈਦਾਨ ਏਕਾਨਾ ਸਟੇਡੀਅਮ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਦੀ ਮੇਜ਼ਬਾਨੀ ਕਰੇਗੀ। ਸ਼ਾਮ 7:30 ਵਜੇ ਸ਼ੁਰੂ ਹੋਣ ਵਾਲੇ ਇਸ ਮੈਚ ਵਿੱਚ ਦੋਵੇਂ ਟੀਮਾਂ ਜਿੱਤ ਦੀ ਪਟੜੀ 'ਤੇ ਪਰਤਣ ਦੀ ਪੂਰੀ ਕੋਸ਼ਿਸ਼ ਕਰਨਗੀਆਂ, ਕਿਉਂਕਿ ਦੋਵੇਂ ਹੀ ਇਸ ਵੇਲੇ ਅੰਕ ਸੂਚੀ ਵਿੱਚ ਸਭ ਤੋਂ ਹੇਠਲੇ ਪਾਏਦਾਨ 'ਤੇ ਸੰਘਰਸ਼ ਕਰ ਰਹੀਆਂ ਹਨ।

ਲਖਨਊ ਅਤੇ ਕੋਲਕਾਤਾ ਇਸ ਸੀਜ਼ਨ ਵਿੱਚ ਦੂਜੀ ਵਾਰ ਆਹਮੋ-ਸਾਹਮਣੇ ਹੋ ਰਹੇ ਹਨ। ਇਸ ਤੋਂ ਪਹਿਲਾਂ 3 ਅਪ੍ਰੈਲ ਨੂੰ ਕੋਲਕਾਤਾ ਵਿੱਚ ਹੋਏ ਮੈਚ ਵਿੱਚ ਲਖਨਊ ਨੇ ਕੇਕੇਆਰ ਨੂੰ 3 ਵਿਕਟਾਂ ਨਾਲ ਮਾਤ ਦਿੱਤੀ ਸੀ। ਜੇਕਰ ਅੰਕੜਿਆਂ ਦੀ ਗੱਲ ਕਰੀਏ ਤਾਂ ਹੁਣ ਤੱਕ ਦੋਵਾਂ ਵਿਚਾਲੇ ਹੋਏ 7 ਮੈਚਾਂ ਵਿੱਚੋਂ ਲਖਨਊ ਨੇ 5 ਜਿੱਤੇ ਹਨ, ਜਦੋਂ ਕਿ ਕੋਲਕਾਤਾ ਸਿਰਫ਼ 2 ਵਾਰ ਹੀ ਜਿੱਤ ਦਾ ਸਵਾਦ ਚੱਖ ਸਕਿਆ ਹੈ। ਮੌਜੂਦਾ ਸਥਿਤੀ ਵਿੱਚ ਲਖਨਊ 7 ਵਿੱਚੋਂ 2 ਜਿੱਤਾਂ ਨਾਲ 9ਵੇਂ ਸਥਾਨ 'ਤੇ ਹੈ, ਜਦਕਿ ਕੋਲਕਾਤਾ ਸਿਰਫ਼ ਇੱਕ ਜਿੱਤ ਨਾਲ ਹੋਰ ਵੀ ਪਛੜਿਆ ਹੋਇਆ ਹੈ।

ਲਖਨਊ ਲਈ ਮਿਸ਼ੇਲ ਮਾਰਸ਼ ਸ਼ਾਨਦਾਰ ਫਾਰਮ ਵਿੱਚ ਹਨ, ਜਿਨ੍ਹਾਂ ਨੇ 7 ਮੈਚਾਂ ਵਿੱਚ 210 ਦੌੜਾਂ ਬਣਾਈਆਂ ਹਨ। ਗੇਂਦਬਾਜ਼ੀ ਵਿੱਚ ਪ੍ਰਿੰਸ ਯਾਦਵ 13 ਵਿਕਟਾਂ ਲੈ ਕੇ ਟੀਮ ਦੇ ਮੁੱਖ ਹਥਿਆਰ ਸਾਬਿਤ ਹੋ ਰਹੇ ਹਨ। ਦੂਜੇ ਪਾਸੇ, ਕੋਲਕਾਤਾ ਲਈ ਨੌਜਵਾਨ ਬੱਲੇਬਾਜ਼ ਅੰਗਕ੍ਰਿਸ਼ ਰਘੂਵੰਸ਼ੀ ਨੇ ਆਪਣੀ ਬੱਲੇਬਾਜ਼ੀ ਨਾਲ ਸਭ ਨੂੰ ਪ੍ਰਭਾਵਿਤ ਕੀਤਾ ਹੈ, ਜਦਕਿ ਗੇਂਦਬਾਜ਼ੀ ਦੀ ਕਮਾਨ ਕਾਰਤਿਕ ਤਿਆਗੀ ਦੇ ਹੱਥਾਂ ਵਿੱਚ ਹੋਵੇਗੀ।

ਲਖਨਊ ਦੀ ਪਿੱਚ ਨੂੰ ਰਵਾਇਤੀ ਤੌਰ 'ਤੇ ਸਪਿਨਰਾਂ ਲਈ ਮਦਦਗਾਰ ਮੰਨਿਆ ਜਾਂਦਾ ਹੈ। ਏਕਾਨਾ ਵਿੱਚ ਹੁਣ ਤੱਕ ਹੋਏ 25 ਮੈਚਾਂ ਵਿੱਚੋਂ 14 ਵਾਰ ਟੀਚੇ ਦਾ ਪਿੱਛਾ ਕਰਨ ਵਾਲੀਆਂ ਟੀਮਾਂ ਜਿੱਤੀਆਂ ਹਨ, ਜਿਸ ਕਾਰਨ ਟਾਸ ਜਿੱਤਣ ਵਾਲੀ ਟੀਮ ਪਹਿਲਾਂ ਗੇਂਦਬਾਜ਼ੀ ਕਰਨ ਨੂੰ ਤਰਜੀਹ ਦੇ ਸਕਦੀ ਹੈ। ਦੱਸਣਯੋਗ ਹੈ ਕਿ ਇਸੇ ਮੈਦਾਨ 'ਤੇ ਕੋਲਕਾਤਾ ਨੇ 235 ਦੌੜਾਂ ਦਾ ਸਭ ਤੋਂ ਵੱਡਾ ਸਕੋਰ ਬਣਾਇਆ ਸੀ, ਜਦਕਿ ਲਖਨਊ 108 ਦੌੜਾਂ 'ਤੇ ਵੀ ਸਿਮਟ ਚੁੱਕਾ ਹੈ।

ਲਖਨਊ ਸੁਪਰ ਜਾਇੰਟਸ: ਮਿਸ਼ੇਲ ਮਾਰਸ਼, ਆਯੁਸ਼ ਬਡੋਨੀ, ਰਿਸ਼ਭ ਪੰਤ (ਕਪਤਾਨ/ਵਿਕਟਕੀਪਰ), ਏਡੇਨ ਮਾਰਕਰਮ, ਨਿਕੋਲਸ ਪੂਰਨ, ਮੁਕੁਲ ਚੌਧਰੀ, ਮੁਹੰਮਦ ਸ਼ਮੀ, ਮੋਹਸਿਨ ਖਾਨ, ਪ੍ਰਿੰਸ ਯਾਦਵ, ਦਿਗਵੇਸ਼ ਰਾਠੀ, ਮਯੰਕ ਯਾਦਵ ਅਤੇ ਹਿੰਮਤ ਸਿੰਘ।

ਕੋਲਕਾਤਾ ਨਾਈਟ ਰਾਈਡਰਜ਼: ਟਿਮ ਸੀਫਰਟ, ਸੁਨੀਲ ਨਾਰਾਇਣ, ਅਜਿੰਕਿਆ ਰਹਾਣੇ (ਕਪਤਾਨ), ਅੰਗਕ੍ਰਿਸ਼ ਰਘੂਵੰਸ਼ੀ (ਵਿਕਟਕੀਪਰ), ਕੈਮਰਨ ਗ੍ਰੀਨ, ਰਿੰਕੂ ਸਿੰਘ, ਰਮਨਦੀਪ ਸਿੰਘ, ਰੋਵਮਨ ਪਾਵੇਲ, ਅਨੁਕੂਲ ਰਾਏ, ਵੈਭਵ ਅਰੋੜਾ, ਕਾਰਤਿਕ ਤਿਆਗੀ ਅਤੇ ਵਰੁਣ ਚੱਕਰਵਰਤੀ।